ივანე ჯავახიშვილის სახელობის თბილისის სახელმწიფო უნივერსიტეტის პროფესიული განათლების ცენტრს წალკის მუნიციპალიტეტის საჯარო სკოლების მოსწავლეები ეწვივნენ. მუნიციპალიტეტის 6 საჯარო სკოლის წარმომადგენლებმა დაათვალიერეს პროფესიული განათლების ცენტრი და გაეცნენ თბილისის სახელმწიფო უნივერსიტეტის შექმნის ისტორიას, ასევე უნივერსიტეტში პროფესიული განათლების მიღების შესაძლებლობებს.

თსუ-ში პროფესიული საგანმანათლებლო პროგრამები 2007 წლიდან  ხორციელდება. თსუ პროფესიული განათლების ცენტრის ყველა პროფესიული პროგრამა  სახელმწიფოს მიერ 100 %-ით ფინანსდება. თბილისსა და ქუთაისში 16 პროფესიულ პროგრამაზე 400-მდე სტუდენტი სწავლობს.

ვიზიტი, რომელიც პროფესიულ ორიენტაციას, პროფესიული განათლების მიღების შესაძლებლობებში გარკვევას  და მომავალ კარიერულ დაგეგმვას ითვალისწინებდა, სათემო ორგანიზაცია „კეთილიონის“ და სასწავლო ცენტრის „გუმბათი“ ორგანიზებით განხორციელდა.